Ubunifu BRN-kilimo wabadili maisha ya Mzee Nzowa

Na Hassan Abbasi:

WAKATI mwaka 2011 Rais Jakaya Kikwete akiumiza kichwa kusaka majibu ya namna ya kuwa na mfumo utakaosukuma mageuzi katika sekta za kiuchumi na kimajii, huenda hakuwa na ufahamu wa madhila aliyokuwa nayo Mzee Nzowa.

Mzee Francis B. Nzowa wa Msanyila, Mbozi, Mbeya ni kama wakulima wengine wengi nchini, amekuwa akilima kwa bidii, akijitoa kuishi shamba lakini kilimo chake kilikuwa na changamoto nyingi. Ni mambo kadhaa ya sadfa tu yakatokea na kubadili maisha yake.

Ni kama sadfa tu, nimesema kwa sababu wakati Mzee Nzowa akihaha kusaka majibu ya namna ya kukifanya kilimo chake kiwe cha tija n ahata wakati mwingine kukata tamaa, Rais Kikwete naye chini ya maono makuu anaamua, baada ya kuona mafanikio ya nchini Malaysia, kuanzisha BRN hapa nchini.

BRN ukiwa mfumo maalum na wa kisayansi wa utekelezaji wa miradi kwa kuweka vipaumbele, kuibua mikakati ya ufuatiliaji makini na ndani ya muda mfupi, unaanzishwa nchini Julai, 2013 na kwa sadfa tu, sekta ya kilimo inaingizwa kuwa moja ya sekta za kipaumbele kati ya nyingine sita.

Ni sadfa nyingine lakini yenye faraja katika maisha ya Mzee Nzowa baada ya maeneo ya kipaumbele ndani ya sekta ya kilimo nayo kuwa na moja ya malengo yake ni kujenga maghala na kuwasaidia wakulima kupata masoko.

Katika mahojiano nami jijini Dar es Salaam wiki iliyopita wakati wa uzinduzi wa ripoti ya Mwaka wa kwanza wa BRN, Mzee Nzowa anazungumza kwa hisia kali anapozikumbuka siku za maisha yake kabla ya ujio wa mikakati ya BRN.

“Mimi ni mkulima wa kahawa kama zao kuu la biashara na mahindi kama zao la chakula. Kwa kweli tulijitahidi kulima lakini kuna maeneo ni kama tulikuwa kizani,” anaanza kusimulia akiwa na hisia nzito na kuendelea:

 

“Hatukuwa na ufahamu wa namna ya kukausha mazao, kuyatenga kwa madaraja bila kuchanganya mfano mahindi na takataka nyingine ili kuweza kupata ubora na soko zuri.”

Anapokumbuka aina ya uhifadhi wa zamani Mzee Nzowa anabadilika, uso wake katika wajihi mweusi unakunjika na kutoa ishara ya kukumbuka jambo.

Nalibaini hilo kutokana na uzoefu na uzeefu wangu katika kufanya mahojiano na watu mbalimbali kama mwanahabari. Saikolojia ya unayemhoji ni muhimu zaidi katika kuendelea kupata habari nzuri na usiyoitarajia.

Nasimama hapa na kuzidi kumdadisi zaidi naye anafunguka: “Zamani tulikuwa tulipata hasara sana. Aina ya uhifadhi wetu wa mazao ulikuwa sio wa kitaalamu.

“Mwaka 2011 nilipoteza magunia 30 kati ya 60 ya mahindi niliyokuwa nimeyahifadhi kutokana na kushindwa kuwa na utaalamu wa uhifadhi na kukosa soko,” anakumbuka na kuongeza:

“Mbaya zaidi mwaka uliofuata magunia yangu yote 60 yaliharibika na nililazimika kulisha wanyama baada ya kukosa mbinu bora za uhifadhi na sisi wakulima kuuziwa dawa feki tuliyodanganywa kuwa ingelinda mazao yetu.”

                                                Ujio wa BRN

Katikati ya madhila haya yote na jakamoyo alilokuwa nalo Mzee Nzowa, vijana wa BRN, wataalamu wa kilimo waliopewa hamasa na ari ya kuhakikisha tunakigeuza kilimo kuwa na tija zaidi na manufaa kwa wakulima wakafika katika wilaya ya Mbozi.

Na kwa sadfa tena, vijana wa BRN wakafika katika eneo la Mzee Nzowa na ananikumbusha mageuzi aliyofanyiwa akisema. “Tulianza kupitia vyama vyetu vya ushirika kupewa mafunzo juu ya matumizi ya mbegu bora za mahindi, kuvuna, kukausha na namna ya kuhakikisha mazao yetu yanapangwa kwa ubora kwa kutochanganya na vitu vingine.

“Tulipewa kifaa cha kupima unyevu katika mazao ili kujua uendelee kuyakausha au la. Na zaidi tumejengewa maghala 30 ya kuhifadhi kisasa mazao na kutafutiwa masoko. Tulikuwa tunakosea na kuondoa ubora wa chakula kwa kumwagilia dawa katika mahindi yenyewe.

“Sasa hivi wataalamu wametuelekeza wapi pa kupata dawa halisi ya kuhifadhi mazao isiyo feki na kwamba tunapaswa kumwaga dawa eneo la ghala kabla ya kuweka mazao na kisha kumwaga dawa nje ya ghala mara kwa mara kuzuia wadudu kuingia ghalani.”

Baada ya mageuzi haya ya kilimo kupitia mikakati ya BRN, Mzee Nzowa akiwa na uso wa tabasamu ambalo nililikosa kwa sehemu kubwa ya mahojiano yetu anasema: “Mafunzo na ushauri tulioupata umeniongezea hamasa ya kulima zaidi. Kwangu sasa mahindi si zao la chakula tu bali la biashara ninaloanza kulitegemea.

“Msimu wa mwaka jana ambao ndio haya mazao tuliyonayo sasa nimevuna kuliko wakati wowote. Nimevuna magunia 140! Nimeuza magunia 100 kwa wakala wa Serikali na sasa ninayo magunia yangu 40 kwa ajili yangu mwenyewe na yako salama hayajaharibika.”

Nilipogundua kuongezeka kwa tabasamu la Mzee Nzowa nikampa nafasi zaidi kujieleza. “Hata bei tuliyopata hivi sasa ni nzuri tofauti na kabla ya BRN. Nilikuwa nauza debe la mahindi kwa kati ya Sh. 2,000 na 3,000. Mwaka huu yale magunia 100 nimeuza kilo Sh. 500 kwa debe na kama unavyojua debe lina kilo 18 na gunia lina kilo 100. Fedha hii sijawahi kuipata.”

Mwisho wa mahojiano Mzee Nzowa ananiambia hana la kusema zaidi ya kushukuru waliokuja na wazo hili la BRN na ananiahidi: “Tuonane mwakani nitakuonyesha zaidi mafanikio yangu, huu ulikuwa mwanzo tu na hata fedha za mahindi niliyouza ndio nimeambiwa zimeingia sasa kwenye akaunti. Nitakuwa mtu tofauti kabisa nikirudi MBozi,” anahitimisha na kuniachia tabasamu.

 

 

Maisha ya Mzee Nzowa ni matokeo yanayoonekana ya ubunifu na utekelezaji katika mpango wa BRN. Ni maisha yanayoonesha matokeo ya watu kutafakari na kutafuta majibu ya changamoto tulizonazo.

*Makala haya yamechapishwa kwa mara ya kwanza katika gazeti la Mwananchi, Machi 12, 2015.

Read More

RIPOTI YA MWAKA YA BRN

Read More

Mkakati wa BRN kutatua tatizo la umeme nchini

 

 

Na Kenneth Mutaonga* 

WIKI hii tunaanza kuichambua miradi ya sekta ya nishati katika Mpango wa Matokeo Makubwa Sasa (BRN). Baada ya utanguliza kuhusu BRN na baadhi ya sekta za mpango huu, nimefurahi kupata fursa hii kuzungumza na watanzania wenzangu kuhusu mageuzi ninayofuatilia kwa kila siku katika kazi zangu nikiwa Meneja wa sekta ya Nishati katika BRN.

 

Makala zangu hizi zitakuwa ni mfululizo wa wiki tatu hivi kutegemeana pia na maoni au hoja zitakazotolewa na wasomaji. Mosi leo nitaanza kwa kutoa maelezo ya jumla kuhusu mikakati ya BRN katika sekta ya nishati na nini hasa tunataka watanzania watupime nacho baada ya miaka miwili au mitatu.

 

Makala ya pili ambayo ni wiki ijayo nitaainisha mafanikio ambayo tumeyapata katika malengo tuliyoweka mpaka sasa. Tatu nitahitimisha kwa kujibu maswali ya wasomaji wetu au kama hakutakuwa na hoja nitatoa uzoefu wangu zaidi kuhusu manmbo yanayotokea katika sekta ya nishati na BRN na watanzania watarajie nini.

 

Kwa utangulizi tu niseme sekta ya nishati nchini inafahamika kwa kukumbwa na changamoto ya uhaba wa uzalishaji wa nishati ya umeme. Hali hii imesababisha mgawo wa mara kwa mara wa umeme na hata kuathiri maendeleo ya viwanda hapa nchini.

 

Kama ilivyoelezwa awali katika makala hizi, mfumo wa BRN ili kutatua kero zilizoainishwa huwaweka pamoja wadau katika maabara ambapo hukaa kwa takribani wiki sita kuchambua na kutoa suluhisho linalohusu sekta fulani.

 

Kwa minajili hiyo hiyo maabara ya sekta ya nishati, kwa kutambua changamoto zinazoigusa sekta hii, ilipendekeza imependekeza mambo mbalimbali kama malengo ya kisekta ambayo jamii itaalikwa kufuatilia utekelezaji wake na kutupima kwayo. Baadhi ya malengo yaliyowekwa ni:-

Mosi, kuongeza ufanisi wa uzalishaji na usambaziji umeme kutoka miradi iliyopo sasa. Mkakati huu unahusisha ukarabati, uendelezaji na ujenzi wa mitambo ya kuzalisha na kusambaza umeme katika sehemu mbalimbali nchini na hatua za kuboresha mabwawa ya kuzalisha umme wa maji. 

Pili, Kuongeza kiwango cha uzalishaji wa umeme kwa zaidi ya megawati 1300 mpya ili kuongeza katika gridi ya sasa ya Taifa. Lengo hili linaweza kutimizwa kupitia uzalishaji wa umeme wa gesi katika miradi minne inayoandaliwa ujenzi wake kwenye eneo la Kinyerezi Dar es Salaam na miadi mingine midogo midogo iliyoko sehemu mbalimbali nchini.

 

Tatu, Kuimarisha zaidi ya kilometa 3,000 za usambazaji wa umeme mkubwa. Katika hili ipo miradi saba ya kuboresha njia za usafirishaji wa umeme. Lengo ni kuhakikisha kuwa tunapunguza upotevu wa umeme lakini pia umeme unawafikia watumiaji kwa uhakika zaidi.

 

 

Nne, Kuwaunganisha wananchi laki 5 zaidi katika umeme wa gridi. Hii itatokana zaidi na kuimarika kwa uzalishaji kama nilivyoainisha hapo awali na hasa kupitia miradi ya usambazasi umeme vijijini chini ya REA.

 

Tano, kuondokana na mfumo wa kutegemea mitambo ya uzalishaji umeme wa dharura. Mitambo ya dharura inafahamika kwa gharama kubwa za uendeshaji. Katika mkakati huu wa BRN sekta ya nishati vyanzo nilivyobainisha mwanzo vya nishati kama vile gesi tunaamini vinaweza kusaidia nchi kuwa na umeme wa kutosha na hivyo kutohitaji mitambo ya umeme wa dharura.

 

Sita, Mageuzi katika sekta ya nishati ni mkakati mwingine muhimu ambao BRN inausimamia. Katika eneo hili lengo kuu ni kulifanya Shirika la Ugavi wa Umeme nchini (Tanesco) kujiendesha kwa ufanisi zaidi kwa kuligawa shirika hilo kulingana na mahitaji ya jamii.

 

Ili kutekeleza mageuzi hayo tuliweka lengo la kuchapisha kitabu kinachoainisha mageuzi ya sekta ya nishati na pia Wizara kuwekewa lengo la kuja na sera ya kuiainisha namna mbadala ya kutoa ruzuku katika sekta hii. Yote haya yanalenga kuleta ufanisi.

 

                                                   Mfumo wa Utekelezaji

 

Katika Makala za awali kuhusu BRN mwenzangu Bw. Hassan Abbas amekuwa akisisitiza sana BRN kuwa na mfumo wa kipekee na nidhamu ya aina yake katikja utekelezaji wa miradi. Ili malengo ya sekta ya nishati yafanikiwe muundo wa utekelezaji wa malengo hayo umeshakamilika ambapo katika wizara ya nishati na madini tumeshaanzisha kitengo cha ufuatiliaji yaani Ministerial Delivery Unit (MDU).

Kitengo hiki kinahakikisha kuwa malengo niliyoyaainisha kila siku yanafikiwa kwa utekelezaji wa kasi kufanyika. Katika utekelezaji huo pale ambapo kuna suala linalohitaji wadau wa aina mbalimbali basi wote wanaitwa na kukaa pamoja ili kutatua changamoto.

 

Kwa mtindo huu wa utendaji, kama tutakavyoona wiki ijayo, matokeo makubwa yameanza kuonekana katika sekta ya nishati. Matokeo hayo, nitayazungumzia katika namna mabadiliko ya kifikra kiutendaji yalivyotokea lakini pia tutaangalia yale yanayohusu takwimu za utekelezaji wa miradi kwa mujibu wa malengo yaliyowekwa.

Tukutane wiki ijayo tutakapoanza kuangalia kwa kina mafanikio katika utekelezaji wa sekta hii chini ya miradi ya kipaumbele ya BRN.

 

*Mwandishi ni Meneja wa Sekta ya Nishati katika Ofisi ya Rais - Ufuatiliaji wa Utekelezaji wa Miradi (PDB) inayosimamia utekelezaji wa BRN. Simu 0687 222 541; au baruapepe kmutaonga@pdb.go.tz

 

Read More

OMARI ISSA ON BRN AND THE TRANSFORMATION AGENDA

Read More

Usimamizi Bora Msingi wa Mafanikio katika BRN Elimu

Na Annastazia Rugaba – BRN

walimu wa sayansi

“Sasa ninaifurahia kazi yangu. Ninajisikia vizuri kuwa mwalimu. Natamani BRN ingeanza toka kitambo. Hata hivyo naona mabadiliko makubwa yanakuja tukiendelea na kasi hii…” hayo yalisemwa na mwalimu Geza Musfapha Juma ambaye ni Mkuu wa shule ya sekondari Ntyuka iliyoko Dodoma, azungumza na watendaji wa BRN waliotembelea shule yake mwishoni mwa mwezi wa kwanza Mwaka huu.

 

Mwalimu Juma alikikiri kuwa tangu kuanzishwa kwa BRN, shule yake imeanza kufanya vizuri. Mwaka 2013 matokeo ya kidato cha nne yalikuwa mabaya sana kwani wanafunzi walikuwa watoro. Kati ya wanafunzi 68 wa kidato cha nne wa mwaka 2013, ni wanafunzi watano tu ndio waliokuwa na bidii yakuja shuleni.

 

Baada ya kupata mafunzo ya uongozi yaliyoandaliwa chini ya BRN katika chuo cha uongozi wa elimu Bagamoyo Mwalimu Juma alipanga mkakati pamoja na bodi ya shule kuhakikisha wanatokomeza utoro shuleni.

Pia aliwahamasisha walimu kufundisha kwa bidii na amehakikisha walimu wanapatiwa motisha kwa ajili ya kufundisha kwa ziada watoto wenye shida ya kuelewa haraka darasani.  Shule ya Ntyuka sasa imeanza kupata mafanikio. Mwaka 2013 matokeo ya mtihani wa Manispaa, shule ilishika nafasi ya 45 kati ya shule 49.  Mwaka 2014 shule ilishika nafasi ya 94 kati ya shule 194 za mkoa. ‘Haya ni mafanikio makubwa sana kulinganisha na tulikotoka’ alisema Mkuu wa Shule bwana Juma.

Mwalimu Erasto Daniel na Mwalimu Kassim Musa ni walimu wa sayansi katika shule ya sekondari Ntyuka.  Walimu hawa wamehudhuria mafunzo ya BRN yanayolenga kuinua kiwango cha ufundishaji kwa walimu hasa wa masomo ya sayansi. Tangu wamepata mafunzo hayo wameongeza ari yao ya kuwasaidia watoto katika jamii yao kufikia ndoto zao za kuwa wanasayansi.

Walimu hawa wanaipenda kazi yao sasa kuliko zamani, “ilikuwa inavunja moyo sana kuingia darasani kuwafundisha watoto somo la Kemia, fizikia na Biolojia nadharia na vitendo bila vifaa. Hata watoto walitamani sana wajifunze kwa vitendo masomo ya maabara. Haikuwa rahisi kwetu na kwa wanafunzi kila ilipofika mtihani wa taifa.’ Alisema mwalimu Daniel

“Leo hii tunajisikia fahari kuwa walimu wa sayansi, tunaweza kuwasaidia wanafunzi wafanye vitendo, na hii itawasaidia kuelewa na kufanya vizuri katika mitihani yao” alisema Mwalimu Kassim.

Hawa ni miongoni tu mwa walimu 1,325 nchini, ambao wamepata mafunzo ya masomo ya sayansi katika Mwaka 2013.

Big Results Now - BRN ni mfumo wa kusimamia, kufuatilia na kutathmini utekelezaji wa mipango ya kipaumbele ya maendeleo ya Taifa. Mfumo huu wa Tekeleza kwa Matokeo Makubwa Sasa (BRN) unalenga kuharakisha kufikiwa kwa malengo yaliyoainishwa katika Dira ya Maendeleo ya Taifa kufikia mwaka 2025 (Tanzania Development Vision 2015). BRN inasisitiza kuweka vipaumbele, kuwa na adabu katika utendaji na kufuatilia kwa kina na kwa tija utendaji na utekelezaji wa miradi mbali mbali ya serikari.

Sekta ya Elimu pia iko ndani ya BRN; na hadi sasa sekta imefanya kazi kubwa katika maeneo ya upangaji wa matokeo na shule, utoaji motisha kwa shule, walimu na wanafunzi waliofanya vizuri, ujenzi wa miundombinu ya shule, kulipa madeni ya walimu, kutoa miongozo ya uendeshaji wa shule kwa shule zote nchini, utoaji wa mafunzo kwa walimu na msaada kwa wanafunzi wenye uelewa mdogo.

Nia ya BRN ni kuwaona walimu na wanafunzi pamoja na wanajamii kwa ujumla ikiwemo wanaharakati wa masuala ya Elimu wakiunga mkono juhudi hizi ili kwa pamoja tuifikie dira ya maendeleo ya Taifa ya Mwaka 2025. Elimu Bora inawezekana Timiza wajibu wako.

 

*Makala hii pia imechapishwa katika mtandao wa Kiswahili unaosomwa na watu wengi zaidi duniani (the most read Swahili blog on earth), blogu ya Michuzi katika anuani: http://issamichuzi.blogspot.com/2015/02/uongozi-makini-wa-shule-chini-ya-brn-ni.html.

Read More

Mfumo wa utekelezaji wa BRN wawagusa Wajerumani

Na Mwandishi Wetu

Ujumbe wa Rais wa Ujerumani ulioko nchini kwa ziara ya siku tano umeonesha kushangazwa na ubunifu ambao Serikali ya Tanzania imeuanzisha katika utekelezaji wa miradi kupitia mfumo wa Matokeo Makubwa Sasa (BRN).

Hayo yalielezwa jijini Dar es Salaam juzi na Waziri wa Uchumi na Nishati wa Ujerumani, Bw. Matthias Machnig wakati ujumbe wa wafanyabiashara wa Ujerumani ulipokutana na Mtendaji Mkuu Ofisi ya Rais-Ufuatiliaji wa Utekelezaji wa Miradi (PDB) inayosimamia BRN, Bw. Omari Issa.

“Ubunifu huu wa utekelezaji wa miradi kupitia BRN ni jambo ambalo hata sisi tunatamani tungekuwa nalo nchini Ujerumani,” alisema Bw. Machnig.

Katika mkutano huo wafanyabiashara hao wa Ujerumani walionesha shauku ya kuwekeza katika miradi ya ubia ya BRN ili kushirikiana na Serikali ya Tanzania kuhakikisha kuwa mageuzi makubwa hasa katika sekta za nishati na uchukuzi yanafanikiwa kwa mujibu wa malengo ya BRN.

Akizungumzia kuhusu mfumo wa BRN, Bw. Issa aliwaeleza wageni hao kuwa Serikali ya Tanzania iliamua kuanzisha mfumo huu ili kuharakisha utekelezaji wa miradi muhimu ya kitaifa na kuwaletea wananchi maendeleo ya haraka.

 

Alisisitiza kuwa mfumo wa BRN unaamini katika kuweka vipaumbele na kisha kusimamia na kufuatilia utekelezaji wake kwa kuondoa urasimu na mtindo wa kufanyakazi kwa mazoea.

“Nitawapa mfano wa sekta ya kilimo katika BRN. Tunatekeleza mageuzi katika sekta ya kilimo lakini si katika kila kitu. Tumeanza na mazao matatu tu ya mahindi, mpunga na miwa tena si nchi nzima bali sehe,mu tu ya nchi ndiyo tumeanza nayo. Mafanikio yatakayopatikana kupitia vipaumbele hivi yatapelekwa mikoa mingine,” alisema Bw. Issa.

Aliwakaribisha wawekezaji hao kushirikiana na Serikali ya Tanzania kwani tayari nchi mbalimbali zimekwishaonesha nia na zimeanza kufanya hivyo. “Treni ya mabadiliko imeanza safari ni juu ya kila mmoja wetu kuwahi ili awe sehemu ya safari hii,” alisema Bw. Issa.

Kwa kuwa BRN inasimamia utekelezaji unaofanywa na wizara na taasisi za Serikali wawekezaji hao waliahidi kukutana na kufanya mazungumzo zaidi ili kufikia makubaliano na wizara na taasisi zinazomiliki miradi hito na Bw. Omari aliahidi kuwa wakifikia makubaliano hayo PDB itasaidia kuhakikisha miradi hiyo inatekelezwa kwa wakati na kwa ufanisi.

Mtendaji Mkuu wa PDB inayosimamia BRN, Omari Issa akiwa na Waziri wa Uchumi na Nishati wa Ujerumani, Bw. Matthias Machnig aliyeongoza ujumbe wa wafanyabiashara wa Ujerumani kutembelea ofisi za BRN Dar es Salaam hivi karibuni.

Waziri wa Uchumi na Nishati wa Ujerumani, Bw. Matthias Machnig (katikati) aliyeongoza ujumbe wa wafanyabiashara wa Ujerumani kutembelea ofisi za BRN Dar es Salaam hivi karibuni, akifafanua jambo wakati wa majadiliano kuhusu uwekezaji katika BRN.

Read More

SIKU UJUMBE WA WAFANYABIASHARA WA UJERUMANI WALIPOIJUA KWA UNDANI BRN



Watendaji wa PDB/BRN wakiwa tayari kuwapokea wageni



Mtendaji Mkuu wa PDB, Omari Issa akitoa utangulizi kuhusu BRN ukiwa ni mfumo unaoegama katika kuweka vipaumbele na nidhamu ya utekelezaji wa miradi ya kipaumbele.



Sehemu ya ujumbe wa Wafanyabiashara wa Ujerumani. Katikati ni Waziri wa Uchumi na Nishati wa Ujerumani aliyeongoza msafara huo.



Mmoja wa Wakurugenzi wa BRN, Neema Ndunguru (kushoto) akijadiliana jambo na baadhi ya wafanyabiashara kutoka Ujerumani.




Meneja wa Sekta ya Nishati katika BRN, Ken Mutaonga akijadiliana na mmoja wa watendaji waandamizi kutoka kampuni ya Siemens kutoka nchini Ujerumani.

Read More